رواية دكان حليمة الفصل الاول بقلم ابتسام رشاد

هما الأشباح والعفاريت ليهم عمر ويترى بيعيشوا كام سنة السؤال ده مارحش عن بالي من أول ليلة ليا في دكان حليمة.. شوفت حاجات عمري ما كنت مصدقها لحد ما شوفتها بعيني طول عمري بسمع من الناس لكن دي أول مرة اشوف.
انهاردة انا اشتريت دكانة وهبدأ اشتغل فيها والأرزاق على الله أمي باعت صيغتها علشان تساعدني أدفع تمن الدكانة والنهاردة هروح انضف المكان وأرش ماية وأعلق اليافطة الجديدة بتاعتي وانزل البضاعة اللي اتفقت عليها مع التاجر وكمان أرصها في الدكانة وفعلا روحت وبدأت أمسح التراب عن الباب وانا متشوق أفتحه وطلعت المفتاح من جيبي وفتحت الباب هو صحيح باب قديم وكنت حاسس إنه هيتخلع وانا بفتحه لكن مش مشكلة هبقى أجيب باب غيره المهم دخلت ولقيت الدكان مليان تراب وريحته زي الزفت ماهو مقفول بقاله زمان ده غير خيوط العنكبوت اللي في كل حته بس مش مشكلة انا هنضفه وأخليه يلمع.

وكان فيه في النص طرابيزة كده مدورة زي الطبلية والدكان موجود فيه الأرفف القديمة لسه زي ما هي ودي هستخدمها مش هغيرها بدأت أنضف الدكان واللي لفت انتباهي الباب كان عمال يفتح ويقفل ويزيق بصوت مزعج وبررت المشهد بإنه باب قديم وعلشان كده بيزيق لكن اللي ملقتلوش مبرر هو الشعر الأسود الطويل اللي لقيته على الأرض وانا بكنس مسكته في إيدي وسألت نفسي يترى الشعر ده وصل لهنا إزاي ولأني مشغول ومستني التاجر رميت الشعر على الژبالة وولعت في الژبالة وحرقتها وكانت ريحتها وحشة جدا خصوصا وهي بتتحرق حتى جاري عم جمال اللي ساكن قريب من الدكان جه اشتكى من الريحة ولما لقاني انا اللي فاتح الدكان وواقف فيه وبنضف قرب من الدكان وقالي
_الله الله.. هو انت يا محمد يا ابني اللي اشتريت الدكان
وقبل ما أكمل الحوار اللي دار بيني وبين عم جمال هعرفكم بنفسي واقولكم ليه اشتريت دكان حليمة ومين هي حليمة أنا اسمي محمد عندي 29 سنة عايش مع مراتي وابني وأمي كنت بشتغل سواق على عربية بضاعة باخد البضاعة من التجار وبوزعها على الدكاكين وطول عمري نفسي يبقى ليا دكان ملكي ابيع فيه واشتري وعلشان كده اشتريت دكان حليمة مكنتش أعرف مين حليمة دي انا اشتريت الدكان من واحد اسمه عبدالله الدسوقي المهم خلوني احكيلكم عن السر اللي اكتشفته ورا حليمة ودكانها.
لما عم جمال سألني وأكدتله إن انا اللي اشتريت الدكان اتفاجئت لما لقيته بيقولي
_الله! إزاي يبيعوا لك الدكان اللي أعرفه إن دكان حليمة مايتباعش ولا ينفع يروح لحد برة عيلة الدسوقي.
_جرا إيه يا عم جمال! انت مش عاوزني أخد الدكان ولا إيه!
_يا ابني كنت شوفلك دكان في حتة تانية يكون رزقها واسع ده مقفول أديله سنين.
_ادعيلي انت