رواية قدر لنا اللقاء الفصل الرابع بقلم ريهام أبوالمجد

مش هقولك تعملي أيه ومش هقولك تسامحي أو تعطي أعذار بس صدقيني بلاش تعملي كدا عشان متندميش في الأخر حاولي تسمعيه وتواجهيه ولو مش مستعدة دلوقتي خلاص خدي راحتك بس متضيعيش وقت يا حبيبتي.
لارين هيام عندها حق يا شروق فكري كويس وراجعي نفسك وأي قرار هتاخديه احنا معاكي فيه يا حبيبتي وهنسندك.
شروق حضنتهم وقالت ربنا ميحرمنيش منكم أبدا.
هيام ولارين ولا منك يا قلبي.
بقلمي ريهام أبو المجد 
الساعة كانت ٥ مساءا وكان لسه محمود في مكتبه وخلص الأوراق اللي كانت قدامه وقرر أنه يروح يشوف الدار ويسأل بنفسه عن شروق.
وشروق كانت قاعدة في الأوضة بتاعتها وفجأة حست أنها محتاجة تروح الدار وتقعد في المكان السري بتاعها هي ومحمود.
وفعلا خرجت وقالتلهم وهيام كانت عايزة تيجي معاها بس شروق رفضت وقالت أنها محتاجة تروح لوحدها.
وقفت تاكسي ووصلت الدار وطلبت من التاكسي يستناها وأنها مش هتتأخر وكانت أول مرة تروح تزور الدار لوحدها من غير هيام ولارين وحازم في الوقت دا كان الحارس اللي محمود مبلغه بالمهمة كان بيجيب حاجة يشربها في نفس الوقت اللي شروق وصلت فيه فمأخدشي باله منها.
نزلت ودخلت الدار وراحت عشان تسلم على المديرة الجديدة للدار لأن المديرة أفنان سايبة الدار بقالها سنتين لأنها تعبت لكبر سنها وهي الوحيدة اللي عارفة شروق وباقي أخواتها لأنهم دايما بيزوروها وطبعا المديرة الجديدة مكنتشي تعرف حاجة عن شروق والباقيين عشان كدا لما الحارس كان بيسألها هي مكنتشي عارفة فعلا ومكنشي بيجي في بالها شروق لأنها متعرفشي أنها متربية في الملجأ هنا هي فكراها بنت عادية بتيجي تقعد مع الأطفال وتتبرع ليهم وخلاص.
دخلت شروق وسلمت عليها بحب وطلعت قعدت مع الأطفال شوية وبعدين راحت تقعد في المكان الخاص بيها هي ومحمود.
شروق بحزن ليه يا محمود اتخليت عني زيهم ليه موفتشي بوعدك ليا مش قادرة أصدق أنك قدامي أخيرا فرحانة أنك سعيد ولقيت أهل وبيت وبقيت معروف للكل بس في نفس الوقت حزينة أنك نسيتني وأنك عايش حياتك عادي من غيري زعلانة منك اووي وقلبي وجعني كان نفسي تعرفني وقلبك يدلك عليا بس يمكن قلبك حب غيري.
قالت الجملة الأخيرة دي بحزن وۏجع في قلبها مش متخيلة أن محمود حبيبها يكون حب واحدة غيرها.
مسكت طباشيرة لقتها جنبها وكتبت على الصخرة اللي كانوا دايما بيقعدوا عليها.
وكتبت كل الأماكن في غيابك فارغة.
وقعدت تملس على الكلام بحزن وفي الوقت دا كان محمود وصل ودخل ولمح بنت من ضهرها قاعدة في المكان السري بتاعهم وشعرها الأسود الطويل مفرود على ضهرها فقال بلهفة وإشتياق شروقي.......